شعر غزل بدوي

**عثمان** · 11:09 PM

ودي بـك وابيـك وابـاك وابـغـاك
جمّعتهـا لرضـاك واختـار فيـهـا

شف ويش منها يتبع احكاك ورضـاك
واللي لك اسقـي مسمعـك لا ضميهـا

غديت (افر)احكـاي واسايـر احكـاك
وانـا تشّـرف لكنـتـي واهتويـهـا

مضمونهـا ودي بشوفتـك واهـواك
ياللي دروب اهل الـردى مـا تجيهـا

صانـك ولـي امـرك وحبـك وداراك
ولاقــدر ردع الحـظـوظ ومجيـهـا

نفسـك مهذبهـا وعـز الله ربّــاك
مايـدري ان جيـش الهيـام يغزيـهـا

الله قسم يبـلاك بـي وانـت يبـلاك
باللي سواتـي فـي العـرب يرتجيهـا

محبة (ن ) ذربه من القلـب تكسـاك
محبـة (ن) صـدق الهـوى يكتسيهـا

يامرك قلبـك بالوفـا لـي وتنهـاك
ناس (ن) على لامـاك تفـرك يديهـا

رزين عقـل ومـن مزايـا مزايـاك
نفسـك تحـب وعفـتـك تمتطيـهـا

تطيع عقل (ن) ما بعـد زل واغـواك
مشاعـرك تعصـاه ..وانـت تعصيهـا

ماشفـت منـك الا عيونـك ويمنـاك
محبـة (ن) راع الـردى مـا يبيـهـا

يقبـض فـوادي لا تخيلـت فرقـاك
ياشف عين (ن) مـا سـواك يعنيهـا

وياعزوة اخوانـك ومطلـب هـذولاك
ناس (ن) محبـة والــدك تدعيـهـا

ناس (ن) تخـدم ابيـك كلـه لعينـاك
وهـو يحسـب ان الله عليـه يهديهـا

ياجعلها تفدى علـى الارض ماطـاك
والله بمـن هــو مثلـهـا يبتليـهـا

لكـن لعـب فـي ياوليفـي تغّـلاك
و نفسي غلاك مـن الصـدود يحديهـا

تبطـي علـي وانـا هنـا واتحـراك
و كبـدي لواهيـب الصبـر تشتويـهـا

واجمّع علومك امـن هنـاك وهنـاك
وو الله لـو انهـا تنشـرى لا اشتريهـا

وعذرك (انا لاهي) يا ويش اللي الهاك
لااهـي ومر(ن)منـت لاهـي تليـهـا

كانك مشكك في الوفا والغـلا هـااك
جوالـي اقـر القائمـه كــل ابيـهـا

رقمك مع (الصادر) ولا (وارد ) اسواك
والناس في اللي ( لـم يـرد عليهـا ).

وايــاك واياني...وايـانـي ايــاك
ومن غيبة (ن) من دون عذر يحميهـا ...
_
نويت مرباع الغضي سيد الاحبـاب
قصدي يزول الجـرح زاد التهابـه

جيت وبقايل نارهم حـول الاطنـاب
بيت الشعر مطوي وباقـي زهابـه

اقفت ركايبهم ومنـي الهـدب ذاب
الدمـع يسـري والذهـل بالاجابـه

على غزير الدمع ضميت الاهـداب
صديت لين لين الدمع يقفي سحابـه

بعض الوجع يمكن تداويه الاعشـاب
وبعض الوجع يا ويل من هو سطا به

عشق بدوي لا حب ما هـو بكـذاب
يوفي ولو جرحـه تجـدد صوابـه

واليوم وصلت بيننا مثـل الاجنـاب
ذاك الغلا يـا ضيعتـه يـا سفابـه

باكر اذا جينا لهـم مثـل الاغـراب
من عقب ما كنـا الاهـل والقرابـه

الامـر لله كـل شـي لـه اسبـاب
ولا الهوى وش لي على ما اهتدى به

وشلون قلبي ما يجي اليوم منصـاب
على الكتم منقـوش بعـض الكتابـه

حتى اثر مشيه مع سهول وهضـاب
مر يجيـه ومـر مـا ينـدرى بـه

قلبي من الفرقا صويـب ومرتـاب
كنه غدى صوين من هول مـا بـه

حزني عليه انه تسبـب ولا طـاب
نظرة طبيبـه عجلـت فـي ذهابـه

ريح الخزامى والنفل زين الاطيـاب
يشدنـي ريـح السمـر فـي ثيابـه

لا اقبل نسيـم بـه خيـل وركـاب
وله في طلوع الشمس عز ومهابـه