انا زعلان منك يا فيس ( حوار بينى وبين الفيس بووك)
انا زعلان منك يا فيس ( حوار بينى وبين الفيس بووك)
"حوار تخيلي"
انا :انا زعلان منك يا فيس بوك .. معقول تعمل فينا كده ... تعمل فى اجيال كامله كده
الفيس :وهو انا عملت ايه يا عم ... انا بخلى الناس تشارك وتستمتع وتحط افكار وتعمل اعلانات وفيديوهات وصور وحاجات كتير وكمان شاتينج
انا :ايووووووون هى دى المشكله اللى مخليانى زعلان منك
الفيس : الشاتينج؟؟
انا :اه الشات !!
الفيس :وليه بئه يا عم ، الشات زعلك فى ايه ؟؟ ايه بيعلق مثلا
انا :لا
الفيس : بيهنج
انا: لا
الفيس :امال فى ايه ؟
انا :السطحيه
الفيس : مين ده ... دوا فى الصيدليه ؟ ولا اكله مستويه ؟ ولا يمكن يكون ده اسم موزه شقيه
انا :لا يا فيس ولا دوا فى صيدليه ولا اكله مستويه ولا حتى اسم موزه شقيه ... الموضوع اكبر من كدا بكتيييير
الفيس : طب ما تفهمنى يا عم الامامير
انا : حاضر يا ابو الاساطير
حاكيلك حكايه غريبه حصلت معايا كده من كام سنه تسمعها ؟؟؟
الفيس :وماله ... ارغى يا عم الحاج
انا : كنت قاعد برغى مع واحد صاحبى وهو ناوى يسافر بره مصر ... فقلت له طبعا يا معلم هاهريك تليفونات ونرغى بالساعات واحكيلك وتحكيلى واشكيلك وتشكيلى
قالى ومين قالك اننا هانرغى فى التليفون
يا عم قول كلام موزون
رغى التليفون يعنى فلوس ومصاريف
يعنى شكلك هتشحتنى عشان نرغى يا خفيف
قولتله امال هانتكلم ازاى
قالى ربنا يخلي لنا الفيس الرغاى
الفيس : اهو اهو شوفت ... يعنى الشات فايده مش عيب زى ما انت بتقول !
انا : لالالالالالالالالا اصبر يا عم لما اكملك
الفيس : حاضر يا عم كمل ( لما نشوف اخرتها ! )
انا : سافر صحبى ده وكنا بنرغى كل يوم ونشيت ونقضيها
بس مع الوقت لقيت فى حاجه ناقصه ، حاجه مفقوده ، حاجه كده مش عارف اوصفها ، بس حاسسها
الفيس : ايه مثلا لقيت الكلام مش بيوصل كويس ؟
انا : لو فضلت تقاطعنى كده كل شويه مش هكمل كلام معاك وهاسيبك بغيظك مش فاهم حاجه
الفيس : حاضر ... كمل
انا : لما كنا بنحكى مع بعض ، كنت بقدر اشوف عينيه ، اعرف هو مخبى ايه ، ايه اللى جواه ومش عايز يقوله ، لما كنا نرغى فى التليفون ، من نبره صوته اعرف اذا كان مدايق ولا مبسوط ، مرتاح ولا عنده مشكله .... على الشات بتاعك بئا ، ملقتش الحاجه دى ... بقيت بستقبل منه اللى هو عايز يديهونى وبس ... من غير ما اعرف ايه اللى جواه ومخبيه .
الفيس : وهو انت فاكرنى هاخليلك الشات بالاحساس ولا ايه ؟؟ اووووف ... ده انت ممل ... بص انا هاقولك على حاجه
انا : قول
الفيس : ليه انا الشباب والبنات بيحبونى وممكن يقدوا ال24 ساعه قاعدين عليا ، عشان انا بدى الحريه والمساحه لكل واحد انه يظهر زى ما هو عايز يظهر ، مش زى ما المجتمع شايفه ، يعنى اللى شايف نفسه قوى ، بيقدر يثبت ده عندى ، واللى شايف نفسه رومانسى ، برده بيقدر يثبته عندى ، واللى شايفه نفسها ملكه جمال ... بتعرف تثبت ده عندى ، كله بالكلام يا حبيبى ، صوابعك على الكيبورد شغاله ومش بتتعب ، انما تقولى احساس وشعور وبلاوى سودا .. انا ماااااااالى
انا : يا راجل .. مش المفروض انك زى ما تورينا ميزاتك تورينا برده عيوبك ؟
الفيس : هسألك سؤال :- لو قلتلك دلوقتى اوصفلى باباك او اخوك او اى شخص هتوصفه ازاى ؟
انا : هقولك يا سيدى ، بابا مثلا شكله بيشتغل ويبدع ، وربانا من زمان وتعب عشانا وانا بحبه قوى
الفيس : باباك عصبى ؟ متهور ؟ ما هزئكش ف مره كده وانت راجع البيت متاخر ؟؟؟؟؟؟
انا : امممممممممم ( بعض الصمت والحيره ) لا مظنش ان بابا عمل حاجه زى كده قبل كده
الفيس : على اساس ان باباك ملاك يعنى ، شوفت بنفسك ، متقدرش تقول عيوبك او عيوب حد بتحبه ، بتظهر كل مميزاته ، بدووووووون عيوب
انا : طب انا اعمل دلوقتى ، اتصرف ازاى ، اعيش ازاى مع جيل كامل واجيال جايه من بعده وهما
( فاقدين الاحساس والشعور)
الفيس : بص هى مش قصتى ولا ليا علاقه ، بس عشان انت صعبت عليا هقولك تعمل ايه .. دور فى بيت كل واحد على الدفا الاسرى ... على الحضن الابوى اللى بجد ... على ساعه الغدا اللى الاسره كلها تتجمع فيها على سفره واحده ويحكوا ... على ساعه عصارى يقعد فيها الابن مع ابوه ولا البنت مع مامتها ويشكوا لبعض ... واوعدك ... اول ما تلاقى ده .... مش هتلاقى للسطحيه وجود .... دور جواك على الشخص الصح ... الاحساس والشعور اختفوا بعد ما بئه كل شخص فى الاسره مع دماغه ... دور على الاسره !!
انا : يعنى تفتكر ان هو ده الحل
الفيس : اييييييييون .... وفكك منى بئه عشان انت صدعتنى salam
http://3.bp.blogspot.com/-wN8XzLpjQA...c2bb6df3ce.bmp
نفسى اشوف بجد المنظر ده يرجع تانى ... فى كل بيت فى الدنيا ... شكرا لانك قريت للاخر واسف لو طولت عليك
منقوول
