كيف نكون اشخاص مهمّين؟
السلام عليكم ورحمة الله وبركاته
جاني سؤال من وحدة تقول لي ديمة انا جالسة بالبيت ، ماعندي وظيفة ، ابي اسوي شيء ، ابي احس اني انسانه مهمه ..
سؤالها جداً مهم !
كون وقتنا حالياً تغير عن وقت امهاتنا وجداتنا وعشان نفهم حاضرنا اكثر خلونا نلقي نظرة بسيطة على الماضي! ،على حياة جداتنا، جداتنا اللي كانو بمجرد تواجدهم بالبيت وقيامهم بمسؤوليات المنزل و رعاية الاسرة و تواصلهم مع المجتمع بطريقة مثمرة هالشيء كان يحسسهم بالاكتفاء ، كانو يعرفون انهم مهمين وكانو ببساطة يعرفون انهم اساس البيت ..
ولما نجي نلقي نظره على حياتنا حالياً نشوف فيها اشياء ماكانت موجودة بالزمن الماضي ، اشياء تخلينا نشوف اللي عند غيرنا واللي مو موجودة عندنا!
هذا الشيء هو السوشال ميديا، اللي خلانا نعرف ايش يسوون الناس الثانين ووين يروحون ووين يجون ووش ياكلون وكيف يتسلون وكيف يمضون يومهم!
نحط ببالنا صورة مشوهه عن الواقع ونبدأ نرسم صورة جدا سلبيه وبدأنا نغرق بتفاصيل حياة الناس!
وللاسف هالصورة صارت مطبوعة بعقول ناس كثير!
وهي : ان حياة الناس احسن منا و انهم يلبسون افضل منا ويروحون اماكن افضل منا لانهم اهم مننا!!
وهم نسوا انهم ما يعرفون حياة الناس الحقيقية وان ما يعرض بالسوشال ميديا ما يشكل الا ٥٪ من حياة الشخص!
اتمنى لو عندي مساحة سحرية واقدر امسح هالصورة واحط بدالها صورة ايجابية
وهي كالتالي :
١/احنا اشخاص مهمين اساساً ، احنا نأدي ادوار مهمه بالحياة وضروري نعرف هذا الشيء .. فإذا حبينا نطور في انفسنا لازم نزيد من ثقتنا بأنفسنا وحبنا لذاتنا وايماننا بأهميتنا.
٢/احنا اشخاص مميزين وعايشين بنعمة مهما كان مستوانا المالي نضل بخير لان الله دايما يرعانا ..
٣/ واذا كنا حاسين اننا نحتاج نملك اشياء اكثر ، لازم نسوي شغله مهمه وهي اننا نقدر الاشياء اللي نملكها اكثر!
ماراح اقولكم لا تملكون اشياء جميلة ، بس حطو ببالكم ان المادة مو كل شيء ، اسأل اي شخص يملك الملايين ، بيقولك نفس الكلام ، المادة نعمه ، هذا الكلام صحيح ، وانا اتفق معكم هي مهمه ، لكن هي مجرد وسيلة وليست غاية ..
والشيء اللي بيحدث نقلة نوعية بحياتنا هي اذا غيرنا من تركيزنا
وصرنا نعيش حياتنا لاجل الغايات ولا نركز على الوسائل!
الشغلة الثانية؛ اذا كنتي تحسين انك تتابعين ناس بالسوشال ميديا يحسسونك بأحاسيس مش حلوة او تحسين سنابهم فاااارغ من الفائدة اعملي لهم انفولو وريحي راسك!
ابيك بس تعرفين ان الشيء الي يزيد من سلبيتك ويقلل من نسبة سعادتك هي المقارنه ،. فحاولي قد ما تقدرين تتخلصين من هذي الفكرة واستبدليها بأفكار ايجابية مثل التقدير ، التقدير لذاتك و لكل شيء ربي عطاك اياه..
deemzblog
