أصل الحيـــاة

[نبع المحبة]

أصل الحيـــاة


صوتي مبحوح
وعيوني متصابه
والامل مجروح
وصبحت جوه الغابة

لا بسمع
لا بلمس
لا بادي ولا باخد
لكن احساسي بالأجمل
عمره ما مني اتاخد

انسان بدون ملامح
والاسم بني ادم
رافض اكون جارح
واكون ف يوم هادم

لحلم كان فكرة
صبح طلب ملايين
واما بان لنا بكره
سالوه ده ملك مين

سكت وسبت ساحتي
والمعركة والجدال
ولقيت اني بقلمي
هامحي كلمة عيال

وبعد كام كلمة
بان لي الشعور الجاي
ان اليأس دب ..
دبه كما الافيال

وساعتها قررت
والقرار هو الحاجة
اللي لسه بملكها
وضلوعي محتاجة
لصرخة حب اصرخها
بصوت برئ و سذاجة



اقول فوقوا
اقول اصحوا
كفاية يأس

لا للكسل

انده للأمل

يجري يقولنا جاي
نعطش ونتمناه
ف الصحرا هو المي
نبرد يدفينا
ولا عمر كان له زي
نغرق ف بحر التوهه
طوق النجاه الحي
يكون هو الامل
ميكونش حلم بضي
ويا ارض كوني تحتي
تسندي صوتي الحي
لسه الامل فينا
لسه حلمنا جاي

بكره صبح لينا
مش نظره كدابه
بكره ده بتاعنا
مش ملك لديابه
بكره مش بقرار
برعية يوم ظهرت
ولا عمر كان ف حمار
يؤمر لنا يا حضرت

احنا اللي جبنا الحلم
واحنا صحاب الفكرة
واحنا اللي جبنا الجول
ف الشبكة يا نكره

يبقي المكان الصح
لحمار بلدنا البهيم
يا اما ف سلة زبالة
يا اما تاكل برسيم

واحنا الامل فينا
لسه حلمنا جاي
اليأس مش موجود
والنصر رافع راي

يا بلادي اوعاكي
تفتكري اني نسيت
حلمي اللي خلاكي
زهرة ف وسط الغيط

قولي لشهيد امبارح
ان لسه فينا صمود
ان السلاح ف ايدينا
حلمنا ومش هيموت

ما هو اصل ازاي تبيد
شعب رافض للطغاه
شايف ف موته الجنه
و ف الامل اصل الحياه

والحياة اجمل ما فيها
انك تعيشها بكل ما فيها
خير وشر وحر وبرد
تقدم بأيدك الامل ليها

اصل الحياة كان شمعة
من اصل 4 شمعات
الحب انطفي
والصدق اختفي
والثقة اتلاشت
وبالأمل عادت

شموعنا والعه
مهما كان
بحلمك وحلمي
وف زمان ومكان



اتحددوا م القدر
ومكانش متحدد
ان اخويا يموت
وحلمه يتهدد

مكنش متحدد
في عقلي وخيالي
اني اكون ف سجنك
ويكون كده حالي

لكن بألامل
صبرت واستنيت
وحلفت اني هاكون
بعد ما هنا بقيت

هاكون بالأمل اقوي
هاملك سلطتي بقلمي
هاعبر وهاستني
همك مع همي

القصيدة ف كلمتين
وعقلي فيهم تاه
اكون لليأس اسير
ولا الأمل اصل الحياة

اصل الحياة مدفون
جوانا علي طول
مرة يكون مجنون
مرة يكون مخمول
مرة يحركنا
ومرة نحركه
مرة يكون ف ايدينا
ومرة نملكه

نملك 3 حروف
بالدنيا واللي فيها
بالأمل كسرت الخوف
والدور عليك وعليها

https://youtu.be/Ibv0tIpp34I

[ذاكية البحيرى]

شكرا على الشعر المؤثر

[جنة]

يسلمووو عزيزتى نبع الحياة على اسهاماتك القيمة ونتمنى المزيد

[بلال]

شكرا على الخاطرة الجميلة

[سلمى النويشى]

شكرا على الموضوع الممتع

[تقى وايمان]

يسلموووو اختى نبع المحبة على مواضيعك الجميلة

[تبارك]

شكرا على الافادة الجميلة
يمكنك مشاهدة توقيعي بالنقر على زر التوقيع

[نور الهدى]

شكرا على الافادة الجميلة

[منيرفا]

شكرا على الموضوع والافادة الجميلة