وَثاري الحوبه هم بالصيت!!

**لطائف الله** · 03:38 PM

وَثاري الحوبه هم بالصيت!!
حسين الساعدي
______________

اجيت
وعمري ضاع بكلمة الياريت
ولحضن الوطن حنيت!!
وشتاكيت
وشتاكيت
أشم ريحة أهلنه ابدربي لو مريت!
وتمنيت شتمنيت!
ألكه أطباعنه الحلوه ابهذاك البيت!!
وتعنيت
وتعنيت
وكلبي ايسابك الخطوات
وِشكَد حَضرت بسمات
ماظنيت
ماظنيت
أنه ابحاجة الدمعات!!!
جَنها اذيابه بعض الناس بس ارسومها جنها حمامة بيت!!
غريب ابديرتي وضليت!!
ورجعت الكلمة
الياريت!!
وشفت مبخوت ميشور!!
أثاري الحوبه هَم بالصيت!!
وشفت
فقره وعله الماكو
فاضوا مستحه وبغايتي اتكَفيت
وتماسيح
التلف كلشي
مامره البحرهه
وزرته وترويت!
وِتمنيت
شتمنيت!
يم هذا البحر
ماجيت!!
‘
شفت اجروح ملجومه!
وحيل ابحاجة الرحمه
وشفت بغداد مهمومه!
تبجي وفاكده البسمه!
وتلَكَتني من ابعيد
محرومه وتريد العيد!
وزدتها ابدمعة الياريت!!
!!!!
شفت أشكال
ما تنكال!
شفت الفاكدين الراي!
شفت اهواي!
شفت الراعي غاد ايحوم والذيب العزف بالناي!
‘
شفت الأعمه يرسملي حال الدنيا وتأذيت
والأخرس يسولفلي بهمومه ودمع هليت!
!!!!
وشفت الما تشوفه العين!
شفت طيبيين مجروحيين
وشفت احرار مسجونيين!
وشفت التاجروا بالدين!
وشفت أهل النفاق اشلون كلبوا صورة الطيبيين!
وشفت الخوف هو ايحَرك الميتين!
ولدموع الوطن صديت!
وأنه ابدمعتي اتوازيت
وصاير بالوطن ممنوع فرحه وطشت الجكليت!!
يامهموم
ينطي
ادموعه للمحتاز!
حيل الدمعتي احتازيت!
وتمنيت شتمنيت!
يطلعلي حلم وبصحوتي وفزيت!
لكن والحقيقه ابهاي
طبت للوطن وياي من طبيت!!
وعاتب روحي وتمنيت!
يهلال
التمني
اشبيك ماهليت!
!!!
ديرتنه وتجافيني
ماجَني ابحظنها ابزغري وتربيت!
والغربه وتناديني
تعال الجيتك إشتاكيت!!
وتوازيت
أعوفك يل الك رديت!
ولميت
اشكثر لميت!
اهموم
وحسرة
الياريت!!
ول الله كريم اتهون من عدها اشكثر ظميت!
وخَذت دمعات
محرومين
أضمها ابغربتي بعدين!
وبابك ياوطن رديت
وتعنيت
بجروح الدمع مريت
وجبت كل العراق ابصفنتي ورديت
جبت كل العراق ابصفنتي ورديت!!
وشرَديت!!
!!!!!
ااالساعدي