كيف تحارب الاكتئاب

**sarrora** · 10:34 PM

الاكتئاب لابد وأن يزورك من فترة لأخرى لأنك لابد أن تمر في حياتك بالعديد من المصاعب، لكن أنت من يحدد نوع هذه الزيارة فهل هي زيارة قصيرة أو إقامة دائمة! من الآخر يعني عاوزين نعمل عكس ما قال عبد الحليم حافظ “ده مش حبيبي… لكن نصيبي” لإن الاكتئاب هيزورك في حياتك ولو مرة واحدة على الأقل

إن الاكتئاب غالباً ما يهاجمك عندما تتعلق بشخص أو بشيء وتفقده فترى العالم قد أغلق أبوابه في وجهك، وهذا لا يعني أن لا نحب شخصاً أو نتمسك بشيء ما ولكن أن يكون ذلك بمقدار ولا نعلق أمل كبير على كليهما “ما تحطش أملك على حاجة أو على حد… عشان ممكن أمل نفسها تحط عليك”

أن تضع هدف لحياتك وتخطط له وتسعى ورائه فتصبح كالقطار الذي يسير نحو وجهته الذي مهما عرقلته بعض الإصلاحات في الطريق أو أجبرته سوء الأحوال المناخية عن التوقف قليلاً أو نفذ وقوده فتوقف قليلاً لابد أنه سيكمل مسيرته ليصل إلى المحطة التي اختار أن يصل إليها

إن وضوح هدفك في حياتك المهنية والشخصية يجعلك تجد كل الصعاب أقل من هدفك المنشود، وفي ذات الوقت فإن محاولة اكتشاف النفس هي الحل لذلك، فإذا ما أحزنك شيء ما حاول أن تقوم بشيء جديد لم تمارسه من قبل لأن الاكتئاب سيفقدك الإحساس بمتعة ممارسة الأشياء التي تعود عليها، بينما عندما تمارس شيئاً جديداً سيفاجئك براعتك فيه أو سيضحكك فشلك فيه.

جرب تاكل حاجة جديدة مجرتبهاش قبل كده ويا تعجبك يا تقلب معدتك فأكيد هتنسيك الاكتئاب وسنينه!

جرب تلعب رياضة جديدة وخد معاك حد من اصحابك وانت بتعمل كده ولما تلاقيه بيضحك عليك عشان بتعمل حاجة إنت ملكش فيها أصلاً هتضحك على نفسك وتنسى همومك!

جرب تروح مكان جديد ما تعرفوش وتتوه فيه (بس ما تخافش غالباً هترجع) ولما تتوه فيه مش هتفكر في اللي راح قد ما هتفكر إزاي تروح بيتكم بعد ما توهت!!

جرب تغير وتركب مواصلات عامة لو بتستخدم عربيتك دايماً وانت هتروح مش طايق نفسك وتعبان فهتاخد شاور وتنام والأرق مش هيلاقي فتحة في دماغك يدخلك منها من زحمة اليوم زي زحمة الناس في عربية مترو واحدة!

جرب تغير دورك في الحياة فلو ولد حاول تعمل طبخة وتعك أو تغسل الغسيل وتنشره وتنضف البيت وغالباً هتخلص كل ده وتترمي ع السرير من غير حتى ما تلمح إللي كان أصلاً مزعلك في أول اليوم…

ولو بنت جربي تتعلمي حاجة جديدة زي إنك تغيري شكلك ولبسك أو حتى نظام أوضتك.

التغيير هو الحل السحري لإنه بيخليك تنسى القديم، ولو مانستش القديم فالتغيير هخليلك تبدأ تفكر إزاي تتأقلم مع الوضع الجديد.. التغيير هو اللي عدو الاكتئاب لإن الاكتئاب يعني الرتابة والروتين وأحياناً بيدخل من النقطة ديه..